للشاعر محمد الصقلي
هذا المساء بمقهى خريفي قرب البيت و غيوم محدقة. و الارض غب المطر و رعد فوق الرؤوس.
——————
دايرين معاك…
شلا ما دايرين معاك
ما كاين غير
شد ليا نقطع ليك
اللعبه ملعوبه
وحده عامره
و وحده مقلوبه
اليد الحديديه
قطع النفس ولا حيٌِد
حذاري تفتح شي باب
انت فضولي
و راك مقيٌد
نعاودها
راك مقيٌد
فكناش الزبانيه
يحصيو عليك انفاسك
فينما تلفتي
ما تلقاهم غير هما
هما هما
دوك اللي حاميين السوق
غير هما
وقتما يشعل ضوك
يگدموك
جيش الظلام
يا ربي وين لهروب
ريح و برد و رعده
و العاصفه ثلجية
ما خلاو ما دايرين معاك
و انت آش درتي لهم
واقيلا يلا مزاحمهم
و جايهم منك الصهد
بغاو هما غير بوحدهم
من لعراضه للزرده
ومورا الزرده
شي همزه
و لا غمزه
و اللي باغي يكون مشهور
يوا هادي
هي هادي
تمثيليه هزليه
و الضحك هزيل
و كل واحد ك يلعب دور
ما كاين غير كحز حيٌد
و القاعه غادرها الجمهور
و شلا ما دايرين معاك
واش زعما دايرين معاك
ولا انت غير موسوس
مالك مكبر عليك الطرح !
ربما هادي أوهام
و غير ك يتخيل ليك
قرب عندي و فهمني
بلا ما نعاود ليك
الناس ما كاين غير دفع
و دفع ثاني
لا تدير زحام
حسن ليك تسوخر اللور
خايفينك لا تزيد لگدام
و اللي شافك ما شفتيه
أها ..عنداك تعثرني
لا تدير زحام..
شلا من حديث
على الزحام
هاد ليام
لعقول عادت مزحومه
و انت ف ايام الله
العالم عندك جوقه
قايمه هندقه فالحومه
اللغط كثير
كثير كثير
و الدنيا صغارت
صغارت
و الارض يا خوفي مكلومه
و الناس مزكومه
يا لطيف
دايره هاد الجرثومه
و عطس انت
نعطس أنا
حنا و انتوما
و اللي ما جبتو ليه خبار
ربما مرمي ف الكومه
و شلا ما دايرين معاك
وخا غايب
بلا ما يشوفك
استغفر الله
رانتا عندو حاضر
يهرب تا من خيالك
غير تبان صورتك
يقلب الصفحه
ويلا وصلو حديثك
دغيأ يبدل الهضره
باركه… كثرت عليك
ولا نزيدك
خليني عليك عفاك
لا تجرني من لساني
آش دايرين معاك
يا الله نبدلو الساعه
التمثيله بايخه
مهزله
البطوله و النجوميه
لابسها من والا
و اللي خسر وراقو
و اللعب كبر عليه
يلا ما لقا ما يدير
ما تبان ليه غير انت
ماشي غير يشد فيك
ينزل عليك
كي الباطل
و يشنق عليك
واجا ما فكك منو
و تگولي آش دايرين معاك…
Views: 8
