للشاعر أحمد الناصري
أررا ..أررا ..
حرش السير
قبل ما يشدنا
عصعوص الحرنة…
نكيل لك
عبرة شعير
قبل الشمس
ما تضربني للكنة…g
نده…
بغيت نخيط ليا تشامير
ومولات الدار
بغات رابعة حنة…
غادي نبيع بيضات
وفروج كبير
هاذوك رزق زهرة
هي لي عندي كنة….
أررا ..أررا…
زرب وسير
قبل ماننسى
طابة زينة الرنة…
على سواك شامة
ما يخونني تفكير
وشوية عشوب
لطيابنا يزيدو بنة….
زينب بغات
مجدول حرير
وماننسى كينة للضاوي
بايتة مهوساه السنة….
أررا..تحرك .
راه. النهار قصير
وندوزو عند الصناك
نحييو معاه السنة….
ياربي نتفكر المخيط
وكيلوات الجير
بغيت نجير
الزريبة وديك الركنة….
بغيت نحسن ونشري
تقضية و قنب للبير
و تسويقة الصباح
ليها جودة ومعنى….
يخرج اللحم
نجي لعندك نطير
وعنداك الفندق
تجيب لي منو اللعنة….
رد بالك
من دصارة لحمير
دير عقلك..
وترصا وتهنا…..
معاك نترافك g
ونرجعوا بيخير
نعاودوها السوق الجاي
الى ما متنا….
Views: 4
