للشاعر محمد لوحيشي
من بعيد شفت الجمال قلبي نطق وقال الله عليه
كامل الاوصاف عليه تخاف اوعدي اجى ماوصلني ليه
وعيوني محال شافو بحالو فالزين وبقيت نشوف فيه
وروحي هامت فالخيال وبديت نحلم ولقيت يديا في يديه
راكبين انا وياه مركب لمحبة
مسافرين بعيد على عيون الحساد
نعيشو حياتنا وعندنا رغبة
نبنيو عش الهوى ونولدو لولاد
لكن لبحر هاج وبدات تلعب لمواج
مشا وجا بينا المركب
ورمانا كل واحد وحدو
ضاع رفيقي وضاع الحب
محال واش باقي نوجدو
وهدي ريح جايا وتصيح فيقتني من اوهامي
شفت الزين صحيح فصيح مزال جاي قدامي
نطق قلبي وقال سلم عليها سلام من عندي
قلت انا محال وعيني فعينيها ترضى بودي
وبقى السؤال وانا واقف في مكاني
محير البال والحيرة نار كاوياني
لله قولو ياالعارفين
واش لهوى هذا اللي لعب لعبو
قلبي انا مسكين
عشق فالحب ماقدرت نعاتبو
سكت وغاب عني لكلام
وسكات مامولف ليا
نهاري انا ولا ظلام
اوعدي الشمس فينا هي
هدي حكايتي ومسك الختام
ياناس قولو وعاودو ليا
الا كان الحب حرام
انا بالنار نكوي عينيا
Views: 6
