للشاعر حسن خيرة
بلّي فيا …
بلا نية سابقة
جمعت شطايطي
دزت من هنا على لهيه
و الغموس كفوس
اتبقط ف حوايج البهلان.
في ضحكة الصقطري
اتلحفت هبال البوجادي
ارميت شبكة التحكاك
بشوفة الخابوري
في درب امزركط امبرطط
كلت ع الله و عسى
يطير مني ثمن القرصة
و لا نصيد حكمة
خارجة من جدول لحساب.
شي اتماشا بعمرو
شي اتماشا بقلبو
شي اتماشا بولادو
شي امكوشط امكلوت
مداير فيها مكلخ
ما على بالوش ف حلقة القرصة
جمعت الخابوري من قراقشي
خويت الموسم الصكع
دزت على ديار
مخاصمة ديار
خارجة من ديار
صادة على ديار
و ديار …
ما دايزاش ف الدبيحة
خارجة سيبة من عين لحكام
و ديار أصلي
طربت عنوة بركلة لحاشية لحلام
بلسان هلالي
و دعدوع بوهالي
غنيت موال بلسان الحال
شي شرب المعنى
شي كال هذا مالو ثاني
بغا يوردنا من ساكية لسقام
جمعت وراقي و حياتي
و شياطة من زهري
و اللي باقي من سهمي
جرجرت بوه من الكفا
حوزتو لعندي
دخّلت راسي سُوق رَاسو
و الفم زاد اتغطا
بسلهام السكات
حيت الشبكة اللي رميت نهار اللول
عينيها واسعة
ماتاواتش مع اللي جاي
ف امرِيرَة المكتاب.
