محمد بلغازي
……………………………………….
/ فقلب واحد الماريو ديال لحوايج ..تعرمو لقوامج فوق السراول مع التريكووات مع ليشوميج .. ومن فوسط الزحام لي كاين زهق واحد التريكو مكمش مزيان وسول واحد السروال باينة منو غير رجل وحدة /
………………………………………………….
التريكو : أفين رجليك الأخرى أصاحبي ؟
السروال : وما نعرف ..يمكن تسدات عليها الباب ديال الماريووهي برا ..؟
التريكو : هي خرجتي بلا خباري ؟
السروال : أبدا ..وشكون خرج ..؟ هادي 20 يوم تقريبا ؟
التريكو : غريبة , 20 يوم ؟ ماشي عادتو هادي
السروال : وهاأنت كاتشوف .. حتى أنا عييت نفكر وما فهمت والو
التريكو : أجي .. عنداك يكون صاحبنا طردوه من الخدمة ؟..ولا يمكن كايخرج بحوايج خرين ؟؟
السروال : لاااا .. باين ليا غير مكمش فالدار النهار كامل , وهادي شي أسبوع حل باب الماريو بالزربة وخدا واحد الفوطة كبيرة وزدح الباب .
التريكو : عرفتي شكون لي غادي يقول لينا أشنو كاين .
السروال : شكون ؟
التريكو : السباط .. سير سولو ورد عليا لخبار
السروال : كيفاش سير سولو ؟؟؟ما كاتشوفش عندي رجل هنا ورجل خارج الماريو .. عنداك غير يجيني لفتق ؟
التريكو : عندك التلفون ديالو ؟
السروال : ديال مول الدار ؟
التريكو : ولااااا ,ديال السباط نسولوه بلا ما نمشيو عندو ؟
السروال : ها أنت قيد الرقم.. 42 مضروبة فجوج هي 84 وزيدها شي أصفار
التريكو : ألو ..وفينك أصاحبي ؟
السباط : شكون معايا ؟
التريكو : هادا التريكو صاحب السروال لكحل
السباط : مرحبا .. أشنو بغيتي ؟
التريكو : واااااالو بغينا غير نسولوك واش حتى أنت هادي 20 يوم ما خرجتي ؟
السباط : وإييييييييه .. وهاد المدة كاملة وأنا مصمك بواحد الريحة
التريكو : حتى أنا .. فقلب هاد الماريو يمكن واحلة شي تقشيرة خامجة
السباط : وما عرفتوش علاش حاصلين هنا.. واش صاحبنا داير الإضراب على الخروج ؟
التريكو : ما نعرف .. المهم ها حنا مقجوجين فقلب هاد الماريو .. وأنت زعمة قريب من باب الدار تقدر تعرف الداخل والخارج وأشنو واقع ؟
السباط : قلت ليك أنا مصمك بواحد الريحة هادي مدة ولكن بانت ليا واحد الصندالة مرة مرة كاتخرج مفرعنة وعاجبها راسها
التريكو : هي كايخرج صاحبنا ؟
السباط : ماشي بزاف وباين ليا ما كايبعدش ..دغيا كايرجع ..وملي كانسول الصندالة كا تقول ليا ماشي شغلك ,,,هادشي كبير عليك ؟؟؟
التريكو : ولكن أشواقع ؟؟
السباط : قالك أسيدي هادا شي فيروس ما فيروس كايدور
التريكو : فيروس ؟؟؟ هاهو السروال غادي يكمل معاك ..
يتبع …
