عبد العزيز حنان
الدار البيضاء
المملكة المغربية
مَدْحَكْ سِيدِي، صْلَاةْ طَاهْرَة وَ عْبَادَة
يا حْبِيبْ لَقْلُوبْ سِيدِي يا رْسُولْ اللهْ
بِيكْ يَا خِيرْ لَخْلَايْقْ ، اتَكْمَلْ الشّْهَادَة
وْ بِيهَا دْخُولِي فْظَلّْ الْمُولَى وَ حْمَاهْ
مَدْحَكْ، عْلَ صَدْرِي وْشَامْ وَ قْلَادَة
أُو فَالّْلسَانْ عْسَلْ لْجَنّة ، يَا مَحْلَاهْ
*******
مَدْحِي لِيكْ سِيدِي ، فْحَقَّكْ قْلِيــــــلْ
مَــا تَكْفَانِي سْوَايْعْ النّْهَارْ وَ الِّليـــلْ
مَا يَكْفَانِي ، لَوْ كَانْ مْثَلْ بْحُورْ تْسِيلْ
يَكْفِيكْ ، مَدْحْ الْخَالَـقْ لْمَعْبُودْ الجّْلِيـلْ
******
مَنْ دَارْ خْدُودِي لَقْدَامَكْ تْكُونْ سْجَادَة
وَ لْسَانِي بَالصّْلَا عْلِيكْ يَلْهَجْ يَا مَحْلَاهْ
مَنْ دَارْ ذَاتِي لْظَلَّكْ تْكُونْ حْرِيرْ وْسَادَة
تَتْشَرَّفْ وْ تَتْمَرَّغْ بَعْطُورْ ذَاتَكْ وَ شْذَاهْ
يَا رَبِّي ، لَا تَحْرَمْنِي نْرَاهْ بْحَقّْ شْهَادَة
وَ نْكَحَّلْ عْيُونِي بْضَيّْ نْوَارُو وَ بْهَاهْ
*******
مَدْحَكْ ، شِفَا مْنْ طْمَاعْ لْقَلْبْ لَعْلِيلْ
وَ دْوَا مَنْ حِيرْتِي ، مَنْ تِيـهْ طْوِيــلْ
مَدْحَكْ ، لَذْنُـوبِـي طْهَارَة وَ غْسِيـــلْ
مَنْ جُــوْر غْوَايْتْ النَّفْسْ وَ الْوِيـــــلْ
*******
الصّْلَا وَ السّْلَامْ عْلِيكْ قَدّْ الرّْمَلْ فْلَحْمَادَة
قَدّْ لَبْحُورْ ، قَدّْ الْخَلْقْ والنّْجُومْ مْعَاهْ
الصّْلَا وَ السّْلَامْ عْلِيكْ ، لَجْرَاحِي ضْمَادَة
وْ شَهْدَة فَالْفَمْ ، وْ لَلْسَانْ لَحْنُ وَ غْنَاهْ
بِيكْ لَعْقَلْ يَتْسَامَى ، وْ بِيكْ الرُّوحْ تَتْهَادَى
أُو تَتْرَجَّى شْفَاعْتَكْ يُـومْ نَلْـقَ اللهْ
*******
مَدْحَكْ ، بَلْسَمْ لْذَاتِــــي وْ ظَـلّْ ظْلِيـــلْ
وَ دْوَا لَسْقَــامِي لَكْثِيرَة ،مَالِيهْ مْثِيـــلْ
صْلَاتِي عْلِيكْ ، قَدّْ مَا هَلَّلْ لْخَلْقْ تَهْلِيلْ
قَدّْ مَا مْشَاتْ لْخَطْوَاتْ لَجْوَامَعْ وَ سْبِيلْ
