شعر ورواية

قصيدة(نْشًفْ الوادْ) للشاعر محمد حديش مجدوب الحرف

للشاعر محمد حديش مجدوب الحرف

23\03\2020

نْشًفْ الوادْ الرَّقْراقْ…
ؤُكْتَرْ لَغْبارْ مْدَرْدَرْ لَعْيونْ…
تَلْفاتْ الضَّحْكا ؤُطاحْ صْفا
تَلْڭاهْ ريحْ صادْ مْنونَخْ…
الْعَضَّا فَ الضَّغْما حْرارْةْ…
وَالْڭَهْمَا سَرْطاتْ الْمَلْهوفْ…
لْبَسْتْ صوفْتْ جَّرْيا سَلْهامْ..
ؤُدَفِّيتْ بَرْدْ الجِّيبْ الكافَرْ…
جادَتْ الوَقْتْ ڭَطْراتْ الرْوَى
ڭَلْتلِيا نْرَقَّعْ توبْ الصَّعْرا…
شَرْقاتْ شَمْسْ ليلْ مْوَضَّرْ
هَرَّسْ جْناحْ الْخاطَرْ…
ؤُشَطًّحْ حْماقْ الوَقْتْ…
شاتَفْ مْحَرْنَطْ عْفيطْ…
تَلَّفْ لَمْصَنْڭَعْ مَقْجوجْ
صَهًّدْ لْيالي دَوًّبْ لَمْخاخْ
الشُّوفا تْكًرْفاتْ بَطْمَعْ اللًّهْفا
ؤُتْكالْ خْيالْ عْرَڭْ المَدْفونْ
طَرْزاتْ لِيَّامْ صْقَلّي باهَتْ…
سَرْسْباتو كِيَّاتْ العْمَرْ…
المَغْزَلْ غَوَّلْ خْليعْ مْرَقَدْ
شَنْشَطْ راسْ لْفَرْطاسْ..
زِّيغا كَتْراتْ ؤُتْڭَطَّعْ المَعْقولْ
ؤُالعًلْمْ قَزْضْرو نْفاقْ الكْلَخْ…
تْخَلَّطْ بْرامودْ طْبَڭْ…
وَكْحاتْ العْيونْ عَطْشاتْ
صامَتْ ؤُصاڭْتْ المْكَفَّحْ…
زْغاريدْ تْسَكْتاتْ لْغيطْ…
ؤُسْبولا تْوَحْشاتْ رْبيعْ زْمانْ…
فْ لَمَّةْ الَخْيارْ عًزْ وْنَخْوَا
بِينْ يُومينْ تْرَشَّاتْ الصَّحَّا…
تْعادا الواقَفْ صَحْ بَالْعَيَّانْ…
جاتْ مَنْ بْلادْ لَصْفَرْ رَزْيا
تَحْصَدْ بْنادَمْ قاطْعا البْحورْ…
حَيْراتْ الْعالَمْ فينْ يَلْڭا دْواهْ
لَبْخوهَا بَالْمْكَرْ ؤُتْزَهْقاتْ الرْواحْ
طاغوتْ الْجاهْ سُلْطانْ حْكَمْهُمْ
الزْعَرْ والصْفَرْ مْغَبْقينْ عَلْمْهُمْ..
وْكُلْ حَفًّارْ لْغيرْ غَدَّا فيها يْطيحْ…
رَبْنا الْعالي يَحْفضْ البْلادْ والعْبادْ…
المَرْضْ الْكافَرْ هاجَمْ الْعالَمْ سايَڭْ…
طاحَنْ شَلاَّ بْنادَمْ تَغْفَلْ مَغْدورْ…
وْكُلْ مَرْضْ ليهْ دْوا غَدَّا يْتَلْڭا…
رْجانا فَ الْعالي يْغيتْنا بَشْفاهْ…
فين عادْ وْتَمودْ وْفَرْعونْ وْغيرْهُمْ
الحَفْرا كُلْها تْسَنَّاهْ أَجَلْ مْزَمَّمْ…
مادامَتْ الغيرْ كيفْ تْدومْ المْتَلِّي
كولْها يْدَوَّزْ وْقاتو وَالدَّايَمْ مُولانا
كولْها يْدَوَّزْ وْقاتو وَالدَّايَمْ مُولانا

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى