قصيدة “يا موجة سْكتي شويّة خلّيني نْحكي” للشاعر بلال الدواس

جسر التواصل31 يناير 2020آخر تحديث : منذ 4 سنوات
جسر التواصل
شعر ورواية
قصيدة “يا موجة سْكتي شويّة خلّيني نْحكي” للشاعر بلال الدواس
Array

للشاعربلال الدواس من طنجة

image 462  - جريدة جسر التواصل

 

يا موجة سْكتي شويّة خلّيني نْحكي
اْْحْكايْةْ يْمَّا للي جالسة بوْحدا تْشْكي
اْلولد للي كان مْعَمَّر عليها الدار
مشى نْ لْغربة
تباع الصُّحبة
اْركبْ لْبحارْ
وبقات يْمَّا
وسْط الظّْلمة
بحُرْقة تْبكي

يا موجة سْكتي شويّة خلّيني نْحكي
اْْحْكايْةْ يْمَّا للي جالسة بوْحدا تْشْكي

كانت يْمّا باغْيَه تْزوّْجو وتْزغرتْلُو
مْلّي خدا الدبلوم غَنَّتلو وْفْرحتْلو
وبقى جالس قدَّامْها زمانْ
يجيب طْريقْ
وْيْدِّي طريقْ
والفرحَة ولّات غِيرْ حْزانْ
والاحلام كُلّا تحرقتلو

يا موجة سْكتي شويّة خلّيني نْحكي
اْْحْكايْةْ يْمَّا للي جالسة بوْحدا تْشْكي

كانت يما تحلم تْرَبِّيلو ولادو
تشوفو ناجح ما بين أَهلُو وسْط بلادو
لكن الولد بقى ضايَعْ
نهار و ليلْ
يدُوقْ الويل
مبقالو غير بْردْ الشَّارعْ
ظُلم الفُسّاد للي سادو

يا موجة سْكتي شويّة خلّيني نْحكي
اْْحْكايْةْ يْمَّا للي جالسة بوْحدا تْشْكي

يما ما عندا غير دموع ودعاويها
اْغيابْ الولدْ للي فرقاتو كاويها
يما خايفه على ولاد الناسْ
فصلاتا تدعي رب الناسْ
يحد الباسْ
تنعس وتفيقْ على أملْ يرجع ليها

يا موجة سْكتي شويّة خلّيني نْحكي
اْْحْكايْةْ يْمَّا للي جالسة بوْحدا تْشْكي

المصدرArray

اترك تعليق

يجب ان تسجل الدخول لكي تتمكن من إضافة التعليقات

الاخبار العاجلة