شعر ورواية

قصيدة (الضحكة لمفگوعة) للشاعرة نزهة الذهبي

 

للشاعرة نزهة الذهبي

آه عليك يا دنيا
جيتك ب لبكية
وانت عليا ضاحكة
لاحني ليك لقدر
بلا شوار
ف شون لغربة
نتمرمد نفطفط
بلا جنحين

آه عليك يا دنيا
مفگوعة فيا الضحكة
ما فرحت ك گراني
ف محاني عشت براني
لا من يگعد وسادي
ولا من يكمدني حنين

آه عليك يادنيا
ديك لغمامة
غيلفت لگلب
تگطر دموعو
شرعت ضلوعي دفات
نبكي عل اللي فات
والجيات…
نتسلف دموعها
من ضباب لوقات
ف رگادي نبات انين

آه عليك يا دنيا
فاضت مريرة لعذاب
نفصل عگادها خيوط
نرقع هدارش زهري لمفردڭ
زهري لمعناد عليا غبين

آه عليك يا دنيا
گفات لمحنة
زادتني محنة
نجرجف الصبر جغمات
نبرد اللهدة
الشاوية لكبدة
من شلا تنهاد
وليعة الزمان عليا
ما لگيت ليه عوين

آه عليك يا دنيا
هادا مكتوبي
كان گماطي وثوبي
نعافر لخطوة ف دروبي
تحيطمات گوايمي
ولگانة تكرفات
ف اوقات لمساعفة
من ضيق لحال
اللي فيا….
حال حتى عاد عسري
بلا يمين

آه عليك يا دنيا
سالفك ف دواخلي كحال
ف حقي نسال!!!
واش لفجر مازال ڭرطيط?
ولا ضو الشمس فگعان؟
ولا الضيم معنگني؟
مركبني تهوال
غناه موال بلا گوال
ولا انا منسي ؟
فيك يا دنيا حزين

27:10:2018

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى