لشاعر السهول أحمد الناصري
فين كنا
وفين ولينا
والخو على خوه
ولى يسد الباب…
مال الطمع
زاد عشش فينا
ما تبعنا السنة
ولا فهمنا لكتاب…
علاش نفوسنا
ولات تغوينا
والشر بدل لغطا
وزاد دار حجاب…
ما ضربنا حساب
ولا ليه قرينا
وحنا بيدينا درناها
ونقولوا مكتاب…
مشات النية
و بقلتها تبلينا
وبنادم نسى راسو
راه ف الدنيا عزاب….
سهال على الدنيا
تزيد تغوينا و تفتننا
حيث لبسنا بطانة لخروف
وبالفعايل ولينا ذياب…
تهنا بين لمسارب
وعلى الصراط غفلنا
ما تزودنا بالخير
ولا منو عمرنا قراب….
كبر الغدر ولحسد
والحق ماليه خذينا
ونسينا صلة الرحم
ولات غ مرحبا لي جا وجاب…
نسينا الموت
وآش لقبر خدمنا
و رجانا فالله
والظن فيه ما عمرو خاب….
ياربي ياعفو
وانت تتوب علينا
وحنا فسفينة الدنيا
ديما غ ركاب…
