خنفرى بشرى 03\01\2025 سلا
فين حنا من هادوك
اللي كالو حرفت بوك لا يغلبوك
الفم ساكت ما يدخلو دبان
فين حنا من هادوك
الي كانت الحكمة عندهم
على طرف اللسان
ولي شافوا الحاضر من زمان
ا كالوا عليه زمان واش من زمان
وصفوا زمانا بعيون بصيرة
هما كالسين على حصيرة
زمموا بلا قلام
كلام واش من كلام
كلام فاق قيمتوا
الفضة و الذهب
أ من عقول..
و أرواح نقية التحلب
فين حنا من هادوك
الي غير سكاتهم كان حكمة
و الف معنى و معنى
فكلمة
مطروزة بحرير فمرمة
بخيوط الصدق و النية
فين حنا من هادوك
الي كانت الحومة كلها
دار وحدة
فين تحط يد يتحطوا عشرة
كان الخير و كانت البركة
كان العسل و الزيت فلخوابي
يتهزو بالمغرفة
كان الماء صافي….و الخضرة
ما فيها دوا(ء)
كانت العيشة عز انخوة
فين حنا من هادوك
الي ماتسمع منهم غير
مرحبا و ألف مرحبا
البشرة مطلوقة
و الطبلة مطرطقة
بشهيوات من يد عمارة الدار
ماشي مشري من زنقة
أ كانت الجورة خاوة
والخوا جورا
كانت النية و كانت السترة
فين حنا من هادوك
وفين هادوك منا
مرة علينا مأسفين
أ مرة مبريين منا
يا حسرة حياتنا كيف ولات
و كيف ولينا حنا
فين حنا من هادوك
و فين هادوك منا
Views: 54
