اتجي تقلب …
تلقانا ف لبياض واحد
غير الغرزة التالية
تحكمت ف النقشة
دفكت طارو الصباغة
و اتخلطت اللوان.
ف هاد اللحظة عرفت الله
خيرو امدفك
لافونطين ف الحنان
هو واحد …
ف الحق واحد
كلشي عندو ساكن ف نفس العنوان.
بلا ما نفكر …
نقدر ندير السطوب
براس مرفوع
و ما نقطعش من ممر الراجلين
حيت القلب لكان بيض
اللوان ف العين كلها تتشابه
شفتي بالرجولة
انجيك من اللخر.
قوز قزح ع كذبة
ف عرس الذيب
صورة ف غلاف قصة للأطفال
لوان زوينة تتجرهم
باش يعومو ف عالم الخيال
يعيشو فيه بكل لغات الأرض
حقيقة الحواس الخمس
و صراع الخير و الشر بالمقلوب
داك الشي كال فرعون علاش
أنا ربكم الأعلى
حيت كلشي بان ليه عبيد
ملي دخلو تحت جناحو
بعكس الله …
خلق و فرق بالتفصيل
كلا و بلاكتو ف ظهرو
و اللون فاضح لسرار.
هذا بيض
هذا كحل
هذا صفر
هذا احمر
و هذا لا منتمي …
استثناء …
ما شاء الله كان
و ما شاء الله لم يكن.
بلا ملونات …
بلا صباغة الما
نرجعو لفكرة
صراع الخير و الشر
تليق تكون عنوان عريض
ف خشبة مسرح
كلا و دورو فيه
و كلا واش لابس.
الظلام … هو سيد الحدث
الضو … شمعة معلقة ف قنت االسقف
النهار … بروجيكتور خاسر
التريسيان ف روبو
و الجمهور من كثرتو قليل
ما مسوقش للميساج.
شفتي على صورة بلا كاضر
بالبيض و الكحل
لواقع أمة بلا عكاز
مخضوعة باللوان
حادكة ف تخراج العينين.
ف البال سؤال معذبني
واش الظلام و الضو ألوان ؟
حقيقة و لا خيال ؟
شكون اللي سبق لآخر ؟
شكون اللي عيموت اللول ؟
علاش الدنيا بدات و ع اتسالي بالظلام ؟
علاش الضو عريس ف الآخرة ؟
و علاش تنحتاجو أصلا لضو
و تنخافو من الظلام ؟
هاد القصيدة كتبتها
ف ورقة بيضة بستيلو كحل
الكحل ظلام
و البيض ضو
زعما هادي صدفة ؟
و لا هوكا بغا الله
أكبر خطأ هو ملي تنكولو
هاد اللون جا معاك
و هاد اللون ما جاش معاك
كيفاش الحاجة هي كذبة
و تنديرو ليها بلاصة ف الواقع
تنتبناوها بالقانون
تربيوها حتى تكبر و تصاح
باش تاكلنا ف الأخير
من نهار جيت للدنيا
وانا تنشوف ع الظلام
حقي ف الضو باقي ما خديتوش
الصف طويل و نوبتي باقا ما وصلت.
المشكل عندي ف الصبر
البرج ديالو ما معروفش
خاطرو ما واسعش
شكون اللي يعطيني
لون الصبر …
طولو …
عبار وزنو …
شحال تيلبس ف رجليه
ع الله وعسى للقيتو نعرفو
ف هاد الظلام
اللي مكحلين بيه عينينا.
تعرفو واحد الحاجة
نقدر نكون منافق
بألف لون
بألف وجه
بألف لسان
نقدر نكون كلشي ف كلشي
فيما كانت الربحة أنا حاضر
بألف قناع و بكل اللوان
لحقاش اللون ماشي فري
ماشي دوريجين
زواق امزور و مغشوش
الجوهر…
هو الحقيقة
هو الأصل
ماركة سينيي
باختصار …
أنا تنآمن بأربعة ألوان
لون البياض
لون الصبر
لون الحقيقة
و لون حسن خيرة.
حسن خيرة.
