الشاعر محمد الناجح
اليوم يوم الثلاثاء
خبر يقين ماشي إشاعات
الطفل ريان عمرو خمس سنوات
طاح ف بير
وصعاب طلوعو . . .
من بعد جميع المحاولات
والأخبار ف جميع مواقع
التواصل تنشرات
جاو الناس من جميع الجهات
وحضرت السلطات . . .
نزلو اوكسجين وكاميرات
الحمد لله
ريان باقي بالحياة
حاصرو المكان وبدات الجرافات
تحفر ليل ونهار
تسابق الساعات
ومن بعد ما
شمس اليوم الخامس غربات
وأخيرا بعد طول المعاناة
نقلت جميع القنوات
ريان لبس طوق النجاة
يا خسارة الفرحة دغيا سالات
ريان فارق الحياة
عيون المغاربة كلها دمعات
وكانت أول المكالمات
تعزية من صاحب الجلالة بالذات
قدم فيها التعزية والمواساة
وبدورنا نعزيو القبيلة
والعائلة بالدات
ندعيو ليهم بالصبر
وللشهيد فسيح الجنات
وبغيت نقول : لذاك المسؤول
لي ما عندو ضمير
ذاك لناعس في البرلمان
ياك حنا ف بلاد الخير
وشحال من ريان معانا جيعان
وشحال من ريان معانا عطشان
ياك حنا بلاد القانون
وشحال من ريان مدفون حي
في هذا الزمان
قرا وقرا. . . وقرا حتى عيا . . .
وراه ف الحومة كارديان
ياك حنا ف بلاد المساواة
وشحال من ريان
تغتاصب وما لقى لسان
شحال من ريان
الله بلا ثمان
شحال من ريان
غارق ف بيار الجهل
وما لقى للمدرسة طرقان
شحال من ريان
مات وطواه النسيان
شحال من ريان
داتو ويدان
شحال من ريان
تاه بين الأمواج
كلاتو حيتان
وشحال وشحال وشحال . . .
هذا ريان خونا الصغير
يا ناس تصرفو
بحكمة وضمير
ولي بغا يدير الخير
بلا شوهة وبلا تصوير
Views: 7
