جسر التواصل ياسين كريكش التطواني
ملي كان كيجي رمضان واحنا باقيين صغار كانت فرحتنا لا وصف لها، وقت الفطور ونحن نأكل كانت التلفزة دائما من بعد الأذان مباشرة كتكون الموسيقى الأندلسية ملي بديت نفهم عرفت بلي الموسيقى الأندلسية جزء من حضارتنا لهذا القيميين على التلفزة علمونا ونحن صغارا نستمعوا للأندلسي وفعلا الإستماع للموسيقى الأندلسية مع الأكل شيء رائع وجميل بحيث الماكلة كتهبط بردا وسلاما.
ليومة وليتي كتفطر وكتشوف الحموضة قبالتك فالتلفزة البارح شفت واحد المسلسل سميتو قهوة نص نص شي حاجة الفقصة قصة تدور داخل مقهى واحد جاي من الجنوب طلب قهوة وحدة هربانة قاليك بغاو يزوجوها براجل كبر منها وحدة محامية واحد ولد مول القهوة المهم هادوا كاملين غادي يخدموا فالقهوة من بعد ماغادي يجري مول القهوة على الخدامين لي كانوا عندو قلت يمكن غدا يكون شي حاجة ما احسن ليومة الحموضة كثر مرات مول القهوة قالت ليه ماتقولش انا مراتك وخليني نعرف اشنو فراس هاد الخدامة وانطلقت الحموضة مع العلم القهوة لي كيتصور فيها المسلسل صغيرة بزاف ولا تحتمل هاد الكم ديال البشر لي خدام فيها باش نديرو عليه قصة ونصوروها مسلسل مع قوة الإشهارات واش فنظرك اسي العرايشي هادشي هو لي غادي يشد المشاهدين ويجيب نسبة المشاهدة لا اظن اسي المدير ..
ملي مشيت نشوف اش كيتفرجوا الأسرة ديالي لقيتهوم كيتفرجوا ف MBC5 رامز عقلو طار الخطير هو الإشهارات ديال الشركات المغربية حتى شركات الإتصالات يعني فلوسنا كديهوم الإنتاجات الأجنبية والقنوات الأجنبية حيث لا منافس حقيقي لها، هادوا غير الأسرة ديالي ملي بديت نسول الأصدقاء على الفايسبوك لقيت كلهوم كيتفرجوا فالقنوات الاجنبية حيث كيقدموا ليهم الجودة، انا هنا ما كنلومش الفنان المغربي حيث الفنان المغربي خصوا يشتغل يجيب الخبز لوليداتو وكون لقا قصة جميلة وسيناريو خطير ومخرج خطير أكيد غادي يقدم اجمل ماعندوا وممكن نافسوا القنوات الأجنبية …
سؤالي الأخير لسي فيصل العرايشي، واش ما كتفرجش فهادشي ؟ واش ما كتشوفش اش طاري عندك، هاعار الله تفرج ولا قلت داكشي زوين وضحكك ويضاهي الإنتاجات لي ولات هاجمة علينا قلها ليا وانا ماعمري نعاود نكتب شي حرف، حاجة اخرى اسي فيصل نحن جميعا راحلون يعني حتى واحد ماغادي يبقى خالدين فيها واش انت مرتاح بلي هادشي يتقيد فعهدك ؟ واش هاد نفس الشركات ماتمشيش زعمة بحالها ولي كتحكم فالمشاهد والفنان يجي يخدم بزوج دريال، سي فيصل عندك تقوليا الفلوس ماكايناش، الفلوس كاينة وإذا غادي نتج قفة ديال الحماضة نتج حاجة وحدة مشرفة ومع ناس عندهوم الكفاءة وتقيد شي حاجة جميلة فالعهد ديالك قبل ماتمشي بحالك.
يتبع…
