رشيد سيوطي
ولا سماحة ليك آليام على بغتة على بغتة سلمتي اللجام…
فين ناسك لكانو تراب ساسك
عز وكلمة و لمسيد فتوة وحكام…
بغيت نفاكد ونواسي ونزور لمقام، نشف حلقي مابقى لي كلام…
قمحنا تغدر وتدرس في غمق الظلام…
وشكون إكد إكول حرثنا منبوش
أغمارنا ممسوس منسل موكول …
شكون إكد إكول رخفو لحبل
راه على عناقنا مفثووول….
ياك التراب ترابي والمحراث بمعزتو كنت عاملو لبابي علام…
ياك زريعة أرضي من مطمورتي كانت تدزي وتكفي شلا فام….
ولا سماحة ليك آليام تشتات أولادك
ماخلا همة ما خلا زمام…
دخلتي في حوشك صحاب الشكارة
بنياب ماضية حارة ماتفرق بين
حلال وحرام…
ترونت تروان، اللوحة، والدواية ،لقلم
ا
ولا سيف بيد لعوام…
أيام عزك سالات وتخلطات شلا بسالات…
وركتك دبلات شجرتك تحشات
حيرات العين أسمقها إسيل لكانون حمات…
واش لحصيرة تكلمت ودوات واش ماسترت ما تمرمدت مادزات …
ما فسكت ما نشفت ماندات ياك
خطوطها مازالت وشم لينا في الدات..
ياك الرزة والشد كان مزين راسنا من جد لجد
ولا شطاطة بالية مركونة لفريق الحد….
مابقى حليب في روابة مابقات شكوة مابقا من الزبدة ماتجبد…
مابقى بياض الكبة مابقى منجج منو لعبانة كانت دفاك تغطى وركد…
توحشت نشم فيك هيدورة لبطانة وفلالس لحضانة
غيابهم زادني ضيم و شلا تخمام…
صوفة مغزولة طعمة وسدة لجلالب
ملمسها أحرير عاشقها مقدم علام…
ما بقى طعام لخديمة وقلوش سمن حايل وحار
مابقات رحمة فين تدواق الجار
بعيني شفت لقفال عملو منو كمامة لحمار…
ناوين إغشو باغين إحشو كلا وتحتو زبار..
تمنيت نغمض عيني
نرجع دري نجري ونسري…
بين فدادن وبين مريرة غير البارح كانت لينا شان ومقام…
واش مازال تشوف مقدم السربة ومجمع الطلبة على كصعة من الطعام…
واش مازال تراب المحرك صابونك إغسل الجدام…
واش عودك لدهم خيمتك ووتاقك
إنسيها زليج جبص ورخام…
واخيت أليام واأخيت أليام اللباس تزير كان سترة زين مفضفض سلهام…
فين ضحكة مي الضاوية فين حداكة مي راضية
فين طعامها لمفتول إقوت وإجبر لعظام…
آه ليام مالك مسختي علفتي السمين مصيتي لهزيل
سقيتينا زكوم زيرتي حزام…
رجعنا ولاغينا واقيلا وشكينا عاى بير لقبيلة بين أصباح وليلة ولا بزبوز يخدم بلرقام…
و الشمعة الوناسة تحرق بدموع
ماشكات ماكالت جوع مزينة البركة ضوهاوشام…
راه الثربة الصالحة أعطيها تعطيك
كان حرتك ورد وأزهر شم ولم غادي يكفيك…
إلى كان حرتك طلح وشوك أحياني أحصادو صعيب إمحنك وإجرح إيديك…
محروتة بمحرات النية لازم القسمية
تجيك…
كان سريع مزوزي وبوري
ولا مسقى بمكانة تكنش برقام وموري….
المهم هو الكاعة والدرسة ببهايم
الكوري…
الزرع إتدرس إدرى وإتصفى وكول الدرويش
الله إخلف أخديت حقي و عشوري…
آه ليام وإطوال لعمر نعمل شيبي عكاز…
نمضي ضفاري مضاوة مهماز…
ننبش نحفر نطمر نعمل بعرقي دواز..
وخا نقفقف ونحبو ونطحر
نجر حفيدي بسناني وبيدي من مكان لغدر…
نوريه البير والمجبد ومكان السربة
ونعلمو إشم إعنق التراب ووساد الركبة…
ونزورو قبر جدو لكبير لكان لعدو رهبة….
راه لفلاحة تقليد تدوز من إيد ليد
ماتعزل أحرار ما تنعت عبيد…
نوصيك الثراب راه سباب العز…
راه فراقو وهجرانو موس في القلب ينغز…
ا
Views: 63
