تدوينة رائعة من صفحة الدكتور أحمد الدافري تتشرف جسر التواصل باعادة نشرها لأهميتها
هاذو ناس كانوا خدامين من أجل الوطن…. بيليكي.. وهاذي صورتهم داخل المحكمة العسكرية ديال المستعمر الفرنسي فالدار البيضاء.. شكون هاذ الناس للي كنحتفظ ليهم بهاذ الصورة داخل إطار كبير ديال الخشب عندي فالدار؟ هاذو مقاومين مغاربة اولاد الشعب. سماهم المستعمر الفرنسي أعضاء منظمة اليد السوداء.. إمتى كانت هاذ المحاكمة فالدار البيضاء؟ كانت فيونيو ويوليوز عام 1954.. آش دارو هاذ الناس؟ هاذو ما ناضوش للفيسبوكيين وقالو ليهم سكتو ما تتكلموش علينا.. هاذو ناضو للمستعمر الفرنسي مللي نفى الراحل محمد الخامس.. واعتبروا النظام الفرنسي الاستعماري إرهابي. وقاوموه بالسلاح.. وبقنبلة فمارشي سنطرال.. وكانت المقاومة للي قاوموها من العوامل للي جعلت محمد الخامس يرجع للبلاد.. شنو وقع لهاذ الناس؟ هاذ الناس، كاين للي تحكم فيهم بالإعدام بتهمة القتل العمد، من بينهم المقاوم أحمد الراشدي للي باين جالس فآخر الصورة وعليه نقطة حمراء، وللي نهار بغاو يعدموه ما خلاهومش يغطيو ليه عينيه، وقال ليهم بغيت نشوف السما ديال بلادي وأنا غادي عند الله.. وكاين للي تحكم ب 20 سنة سجن نافذ مع النفي، بحال عبد الكبير الدافري للي باين فالصورة فالوسط عليه نقطة حمراء وفالتريكو للي لابس حاطين ليه رقم 52 وهو رقم الاعتقال ديالو.. إيوا؟ شنو وقع لهاذ الناس من بعد المحاكمة؟ اربعة منهم تحكم عليهم بالإعدام بتهمة القتل، والباقي سيفطو المستعمر للسجن المركزي ديال بور ليوطي للي هي مدينة القنيطرة دابا. ومن بعد ما رجع الراحل محمد الخامس طلب إطلاق سراح جميع السجناء.. وخرجو هاذ المقاومين من السجن… واستقبلهم محمد الخامس.. ونوه بالوطنية ديالهم… شمن تعويض خداو هاذ الناس؟. الدولة المغربية كانت محتاجة لهيكلة الإدارة من بعد الاستقلال.. للي قاري فهاذ الناس اعطاتوا وظيفة على قدر المستوى الدراسي ديالو لأنها كانت محتاجة لموظفين. كاين للي توظف فالشرطة، وكاين للي توظف عساس على جردة، وكاين للي توظف فإدارة المياه والغابات بحال با عبد الكبير للي التحق بالوظيفة ديالو من الدار البيضاء للشمال المغربي وخدم حارس غابة فالفترة ما بين 1957 و 1987.. ومن بعد ثلاثين عام ديال الخدمة حصل على التقاعد ديالو بمبلغ نحشم نقولو.. واش با عبد الكبير للي توفي فرمضان ديال 2018 خلّى شي مأذونية ديال شي طاكسي أو كار أو خلى شي فيلات أو شي باطيمات، تعويض على ثلاثين عام وهو خدام طايش فالغابات كيحرس فممتلكات الدولة، وكيتنقل فالشتا والريح والشمس الحارقة من جبل لجبل ومن غابة لغابة ومن دوار لدوار؟.. مسموح لأي واحد يبحث ومطلوب من الدولة حتى هي تتدخل فالبحث وتكشف على شنو خلى لا هو ولا للي بحالو من هاذ الناس.. خلاو غير الرضى لولادهم وبناتهم.. ووصاوهم باش للي بغى يوصل لشي حاجة، يوصل ليها على ذراعو بالخدمة والجد والاجتهاد وحب الناس، وبالكرامة وعزة النفس.. والتعويض غايجيبو الله في شكل إحساس بالسكينة الروحية والراحة النفسية. وللي خدم شي خدمة يخدمها لوجه الله.. وهذا ما كان..
Views: 31
