سعيد هجري موسى / الرباط
للاَّ منّانة
شْحال تْمنّات
وليد ولا طفلة
اللّي جابها الله مزيانة
تزادت
زيادة
ف غيابو
هذا مكتابو
ولْدات
وليد واحد
سمَّاتو عيسى
دَارت
حفلة
دَارت
رفيسة
مول الدار
كان محزم بفرادة
عند لحدادة
گالوا مات
ما عرفات
صحة اخبار
ولات هجالة
و تْرَمْلات
ورفْضات
طنز الرجالة
بْكَات
عانات
شْكات
كَبْرات
ربّات
قرَّات
تكَرفسات
گالت للِّيهودي
سيدي
وعيدي
والگلب فايض ديدِّي
و ف وجه الكتاب
الجلدة قبْلات
يوم الجهد ذاب
و رشَّاها العذاب
بدموع الفرحة بكات
گالت فرحي بُوْليدي
والدنيا معاها فَرْحات
يوم تخرَّج من المعهد
حاصل على شواهد
عيسى ولَّى عساس
الشيب غطَّى الراس
و مرة مرة يخدم ف الاعراس
قانع باللِّي قسّْمو ربي
الهم ف الگلب مخبِّي
ما يْمد يَدّو للناس
ما كْبر ف سْعايا
ميمتو مْعَلماه العناية
يوم گال يحط البيضة ف الطّاس
ضْرَب اخماس ف سداس
و ارْفَض عيشة الذل
و التخماس
ياك لاباس !!!
حيت ما بْنى حيوط
ما حْفَر ساس
ما دار جوهر ف خيوط
كِيف الناس
ما عرٌى على سْنان
كيف الگران
كيف فْلان و فلان
گال يْولِّي شاعر فنان
يكتب قصايد
يطرز حروف
يطرد الخوف
يزيد بْزايد
يألَّف كتوب
يعمل ديوان !!!
بحال الناس
يْفرَّغ فيه هَمّو
و يصفّي دَمّو
ويطوال كَمّو
يَتْغطى الراس المْعرّي
وتْزول سمية عيسى الدَرّي
كْتَب قصيدة
غارقة وعريضة
معانيها فريدة
حاملة هَمّْ
عَرّات على ظلم
و سَمّْ
وسْليب الحق
والحظ
ونهيب المال
وَصْلات لصحاب الحال
غَيْروا قاف القصيدة
بْميم مجوفة
كيف قيود وكْبال
ولاّت مْصيدة
ولاّت مْكيدة
داروه قَتّال…….
يْدور بين الحْباس
تْحبْست لنْفاس
هرْسوا آمالو تهراس
تْهرَّس القَلّوش
طاحت ف التراب السْمينة
نساوه كْبار الكروش
بلا ضلوع سمينة
تْرَوْنات حياتو روينة
ما هَزّْ ديال الناس
ما فْ كرْشو عجينة
ما سْخون الراس
منّانة رْشات
ما زارْتُو
و لا مرة عندو مْشات
الشجرة اللِّي غرْسات
طاحوا وْراقها
و تْهرْسات
بالبْكا عْمات
حْماقت و هَبْلات
الكبدة الحنينة
فدْفدات
و عْيات
من الدنيا رَحْلات
عيسى جاه العْفو
يوم الدموع نشْفو
والعظام شرْفو
والورود خرْفو
وعيّاه ذل التقْراس
رماوْه ف الزنقة
ما عَندو خَرقة
لا حنين
لا رحيم
و رَجْعات المصيدة
قصيدة
بين القَرعة
والكاس……..
حساب الگاشوش ما يخٓرجّش
