عبد العزيز حنان
الدار البيضاء
كَـانْ عْلِيَّ ،
مَنْ لَبْدَايَة ..
نَعْرَفْ :
أنَا سْحَابَة .. عَاڭْرَة .
تَعْصَرْهَا السّْمَا ..
مَا تُڭْطَرْ مَـــا.
بَاللِّي أنَا ،
غَيْمَة مَخْدُوعَة خَدَّاعَة …
فْقَيْظْ الصَّيْفْ .
*******
مَا تَرْوِي صَابَة .
مَا تَحْيِي جْنَانْ .
مَا تْشَبَّعْ ڭَلْبْ ،
لَّ حْلَامُو عَطْشَانْ …
مَنْ لِّلي فِيهْ ،
وْ مَا بِيهْ …
بْالَعْنَادْ غَضْبَانْ …
…
غَيْمَة مَخْدُوعَة خَدَّاعَة …
فْقَيْظْ الصَّيْفْ .
مَا تْوَرَّد ،
جُوفْ ظَمْآنْ .
وَ لَا تَسْقِي ،
اشْجَارْ وَارْفَة ..
بْجُوفْ الْغَابَة …
فِيهَا لَغْصَانْ ،
مَنْ عْطَشْهَا ..
لَوْرَاقْ تْجَفّْ .
*******
كَانْ عْلِيَّ ،
مَنْ لَبْدَايَة ..
نَعْرَفْ ،
بَاللِّي أنَا .
لِيــلْ حَالَكْ …
بْلَا ڭَمْرَة .
بْلَا نْجُومْ .
الظَّلْمَة فِيهْ .. تَتْسَيَّدْ …
وْ تَتْرَبَّعْ فْسَاحْتُو ….
وْ لِيلْ شَتْوِي ،
مَنْ الْهَمّْ وْ لَكْدَارْ ..
زَفْرَاتُو تَتْنَهَّدْ …
يْعَافُو السّْوَادْ ،
وْ مَنُّو ،
يَطْلَبْ النَّجْدَة ..
بْطَلَّةْ لَفْجَرْ .
يَمْكَنْ يَمْسَحْنِي ،
مَنْ صُورَةْ مْرَايْتُو .
مَنْ رِيشِي يْعَرِّينِي ..
وْ يَنْتَفْ وْ يَنْتَفْ …
*******
كَانْ عْلِيَّ ،
مَنْ لَبْدَايَة ..
نَعْرَفْ ،
بَاللِّي أنَا .
مَاشِي وَاحَدْ ،
مَنْ لْفُرْسَانْ ..
عْـلَ صَهْوَةْ الْخِيلْ ،
يْشَالِي بْسِيفُو ..
يَلْهَبْ ،
ڭْلُوبْ لْغَزْلَانْ …
يَـــاهْ ، يَـــاهْ ، يَـــاهْ …
شْحَــــالْ كُنْتْ ،
أنَا .
يا ڭَلْبِي مَغْرُورْ …
حْلَمْتْ بْلَعْلَالِي ،
وَ لْڭَمْرَة ،
لِيَ بْجَنْحِينْ الصّْدَرْ ،
بَالْفَرْحَة تْزَغْرَدْ …
هْنَا ڭْبَالِي …
وْ فْلَحْظَة .
صْحِيتْ مْنْ لْحَلْمَة .
وَ سْرَابْ ڭُدَّامِي …
وَ جْرَاحْ بَالْكَسْدَة …
فِيهَا الْمَلْحْ ذَابْ …
وْ باللِّي هَاذْ ،
الْخَافَقْ فِيَّ …
الشَّاقِينِي ،
لَمْوَّلعْ شْوَاعَلْ
مَا تَابْ ،
وَ لَا نَاوِي يْتُوبْ .
رَاضِي بَالْقَسْمَة ،
رَاضِي بَاللِّي ،
عْلَ جْبِينُو مَكْتُوبْ …
مَا يَكْرَهْ ،
مَا يَنْكَصْ ،
وْ بْالَمْحَبَّة يَنْبَضْ
وَ لْعَهْدُو مَا يَخْلَفْ .
