شعر ورواية

قصيدة (واش بلغنا الحد؟!) للشاعر محمد الصقلي

روما. محمد الصقلي
21.03.2020

واش بلغنا الحد
صافي.. !
والسوق تسد
و فيام الله هذا يوم الحد
طعمو رصاصي
و القلب صخره
وقف فيها النبض
هذا عطش ما يطفيه ما
ما بقا ذوق تا للنعمه
و المد اشتد
واش بلغنا الحد ؟
صافي !
و هاد الكورونا
فين كان مخبي هذا شحال
عاد اليوم بان
وجات على غفله
البلوى و الرعب
و لهوال
واش هاد الفيروس غاز ؟!
و حنا شميناه
ولا باطل حل بنا
و لبسناه
الخوف راخي جناحو
واش يغطي الشمس
و يلف السما ضباب
يا خوفي من فيروس
بالصح
لا الريح تجيبو
و يسيح
و ما ينجا منو حد
وحنا مساجن دابا
بحال زغبي الطيور
يلقا راسو بلا جنحين
فينك يا حياة لبارح
كانت نعمه
رغم شقاها
و محاينها
عشنا و نكرناها
و شحال كنتي لذيذه
يا حياة لبارح
بحال يلا ذكرى بعيده
و غير لبارح
وحنا غافلين
ما جينا نفتحو عينينا
تا لقينا السما غمه
و تا لبحر ماه فسد
يا براح القيامه
شحال ما تحصي و تعدد
وشحال من علامه
الجربه هادي
من خبار لخبار
و المهدي المنتظر
و اللي طاير بلرض
هازها بمنقار
واش بلغنا الحد
عليها السوق تسد

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى