انا والليل للشاعر عبد العالي الوالي
حرقة من باب الشقا طلات
دمعة على الخد سالت
ودمعة بقات مقجوجة فالعين
…
جرتني نجمة من وجه السما
نشوف الليل فالليل
ونفدفد للساكن فيَّ حنين
…
لقيتني وحدي فالليل
غوته خرجت من القلب
زلعت الزفرات
جمعت الحنين
…
جاتني فبالي.. الساكنة فبالي
جاتني نوبة نوبة فنومي
جاتني فايق
جاتني سهران
كَطْعت ليلي كلمات
شَعْلت حرف جديد
بيه ضويت لَمْبَات
بيه ضويت الكعدة
بيه لونت سكاتي
بيه داويت شقايا
…
سكني الليل ديما
سكنتني هي من شحال هادي
نسكنت انا ما بق فيَّ حتى شي
تَنْسِيت وعمرني ما نسيت
…
حرقة باقية من ديك الحرقة
حرقة لفراق شايطة
حرقة لشواق دايبة
حرقة لحباب تصواب
إلى تكطع لجفا من الجدر
إلى لقيتني بسمة فوجوهكم
وانْتُما فجوايا
بحر …
نرفد منو الصفا ..
نرفد منو لمحبة ..
نرفد منو العوين وقت الشدة
…
باقي انا والليل
نشفت عيني من النعاس
و الليل فغيامة حواس
يشوفني مرة مرة
يطل علي من نجمة
نطل عليه من حرف
…
بكات لغيامة على الشوق
زَوْكَات..
والشوق تَهْرَق فقلب محروق
وعيني شقات كيما شقيت أنا
وقلبي ذاق من حر لشواق
اللي ذقت أنا
…
مزال أنا والليل رفاكة
مزال به ديما نتلقى
مزال حرفي ليه وسادة
مزال هو لشقاي غْطَ
…
الشقا ما سد بابو
والحرقة مازلة فالدموع غارقة
وانا والليل مزال ما لقينا
طريق لفراق ..
وحروف النعاس تودرت فينا
كلنا نبداو من جديد الكعدة
مع لشواق..
مع الحرف..
يمكن يطل علينا النهار بجوج
هو يبياض
وأنا شقاي يسد بابو …
عبدالعالي الوالي
