شوف يا صاح للشاعر فهمي عبد الرحمن
عَينْ الشَّمسْ
مَا تْرَمَّشْ
مَا تَعْمَى
مَا تْعَمَّشْ
شْعَاعْهَا مَنْشُورْ
شَاهَرْ
فَضَّاحْ
عَينْ الكَّّمْرَة
لُغزْ مْلَغَّزْ
نُوبَة تَغْمَزْ
نُوبَة تَبْرَزْ
نُوبَة تْحَرَّزْ
عَلَّبْطَاحْ
شُوفْ يَا صَاحْ
وَ ارْخِي سْهُومْ النْوَاجَلْ رْمَاحْ
وْ صِيبْ المَعْنَى بَعْقَلْ وَضَّاحْ
رَا مَدْرَسْة الدَنْيَا مَا مْعَلَّقَة لْوَاح
نوَصِّيكْ يا خْليلْ
من الوَحدة
و عْطًش القنْديلْ
من الشَمعَة
و قْصرْ لفْتِيلْ
و لفْكَارْ تَتْوَقَد
.. و تْميلْ
و الهَمْ فاجْتِيَّاح
تْرَزَّنْ ..
تْرَزِّنْ و كُونْ اعْقِيلْ
و كون شَمْعَة
ف جَوفْ المصْباحْ
و لا تَرْتاحْ ..
حتى تزَوَّل لِيلَكْ
و تْطَلَّعْ الصْبَاحْ
ويلا كُنْتي فالغَابْ
وْ كَانُو نَاسهَا غيَابْ
و حرَّاسْهَا ذيابْ
و ثعالبْ قباحْ
نوَصِّيكْ يا صَاحْ
لا تْحَط السْلاحْ
