شعر ورواية

خْزِينْ الكْلاَمْ

للشاعر محمد حديش
مجدوب الحرف

شَلاَّ كْلامْ مَخْزونْ مْغَلْغَلْ حْروفْ

تْزاحَمْ فْ شونَتْ النَّفْسْ صْروفْ

فايَضْ مْعَصْراهْ حَزَّتْ حَرْ الْوَقْتْ

تَلْگَاهْ فْ وَسْطْ اللِّيلْ سارَحْ مْگَمَّرْ

سَهْرانْ مْزَمَّمْ رْسومْ زِينْ القْوامْ

ؤُمَنْ العْمَرْ غْزَلْنا صوفَتْ الأَيَّامْ

نْدَفِّي بِها شِيباتْ العْضَمْ بَالوْقَرْ

قَصْتي مْعَ القْصيدَة غْرامْ قْديمْ

عَطْفا سَكْناتْ فَ الگَلْبْ تَعْشاقْ

عَزْبَة مْحَنْيَة نَقْشاتْ تَسْحَرْ لَعْقَلْ

تْرَبْعاتْ فْ ميزانْ الخاطَرْ كْلامْ

حْلاوْتْ زِينْها سْحَرْ البالْ مْهَتْهَتْ

نْضَلْ مْعَ القْلَمْ مْعَنْگينْ الحْروفْ

مًنْ بيتْ لْبيتْ سْوالَفْ هَبْلو الْعينْ

مْحَزْما شَطْحاتْ شَحْطاتْ الْقيلْ

ؤُنْدَنْدَنْ عَيْطاتْ مْجَدْبا جَرَّا تَسْحَرْ

وَالْكاسْ مَكْبوبْ سَكْراتْ مَرْ الْوَقْتْ

نَتْلاوَحْ بْشوفَتْ گَصَّتْها تَاجْ الزِّينْ

الْقْصيدَة كْلامْ ؤُميزانْ لِيا تْخَطْباتْ

تْكًتْباتْ فْ زَهْري المْخَبَّلْ عْطِياتْ

جادَتْ بِها گَانَتْ ريحْ الْبالْ الْواسَعْ

يَا سَّامَعْ رْوَى وْقَيَّسْ الْمَعْنَى وْزانْ

وَعْبَرْ تَسْگَامْ الْهَضْرَة فينْ صَدَّاتْ

الكْلامْ مَنُّو بْحورْ مْسَرْجا قْصورْ

تَبْناتْ فَ الهْوَى شَلاَّ خْيالْ مْوَضَّرْ

وْمَنُّو حْكامْ تَنْفَعْ خَطْواتْ الْگَدَّامْ

تَحْفَضْ الدَّاتْ مَنْ تَهْراسْ الرَّاسْ

آحْ مَنْ الضَّرْبَة الْغافْلَة تْفَيَّقْ رْگادْ

وَتْعَرٍّي فَ المْخَبِّي تَزْواقْ الگَهْمَة

تْشوفْ حَتَّى تْشوفْ ديكْ الضَّلْمَة

وَتْبَهْوًنْ مْعَكَّزْ عْلى صْبَرْ وَخَّا يَدْبَرْ

هَزٍّيتْ حْروفْ التْرَبْيا نْراري مْتَقَّلْ

نْدَعْدَعْ عْلَى ضْهًرْ شوفْتْ الْحالْ

نَحْرَتْ زْرَعْ الصْفا وْنَبْني الْمَزْيانْ

مايْهَمْني خايَبْ النِّيَّة مْحَزَّمْ مْكَرْ

حيتْ خْزينْ الكْلامْ مْصَفِّي الشَّهْدْ

25\12\2019

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى